Cineclube do Liceo Mutante: Matador de ovellas


Mércores 3 de abril ás 21:00
Despois do descanso da pasada semana o Cineclube do Liceo Mutante retoma a súa actividade coa proxección do filme de Charles Burnett: Matador de ovellas (Killer of Sheep, Charles Burnett, EUA, 1977, 83’, VOSG)

O filme está centrado no tempo libre melancólico que o protagonista -un traballador canso dun matadoiro – pasa coa súa familia e os seus amigos. A lenta consumición e o lento goteo deste tempo libre mentres el se vai carcomendo por dentro, é esencial para a experiencia da película.

Tamén alcanzamos a ver o protagonista no seu traballo, pero a maior parte do que sabemos do seu traballo e dos sentimentos que lle produce, provén de ver a súa alienación xeral e o seu esgotamento cando está na casa: reparando a pila da cociña, bailando coa súa muller no cuarto de estar, rifando ao seu fillo, rexeitando participar nun roubo planeado por uns veciños ou intentando arranxar un coche.
Tirado de : http://centrodecultivoscontemporaneosdelbarrio.wordpress.com/2013/02/24/este-miercoles-peli-killer-of-sheep-sopa-vegetariana/

Entrada de balde

Negro + Esperit!


Martes 2 de abril ás 20:00
Os protagonistas de dúas das noites máis máxicas xamais vividas no Liceo están agora mesmo xuntos, montados nunha vella Seat Inca que no seu día formou parte da flota de Telefónica, escoitando cintas e percorrendo a península nunha xira que ten parada, moi agardada, en Pontevedra. Son Mau Boada e Fer Junquera, máis coñecidos como Esperit! e Negro.

Que dicir deles? Pois que Esperit! é un simpático multiinstrumentalista que se agocha no Montseny, amigo do uso dos procesos caseiros, da melodía, da cacharrada e da improvisación con fins psicodélicos. Ten a misteriosa capacidade de transformar o ambiente dos lugares nos que toca nunha burbulla luminosa de ledicia enerxética na que dan gañas de quedar a vivir para sempre. Convén sinalar que no seu curriculum figuran proxectos como Zeidun, Omega Cinco o Les Aus, entre outros. Desta volta ven presentar o seu “Elèctric Mustela”, logo de deixarnos coa boca aberta no seu día co “Endavant Continu” e o fabuloso compartido con Atomizador.

Pola súa banda, Negro, saído da canteira levantina e curtido en proxectos como Balano, Estrategia Lo Capto! ou La Orquesta del Caballo Ganador, trae aínda quente o seu “Formación del Espíritu Nacional”, discazo lento, cheo de calma e de luz, no que sobrevoan ecos de Derek Bailey, Jim O’Rourke, John Fahey ou Loren Connors. Fer non necesita máis que a súa guitarra para subir ó público na súa alfombra máxica e facer unha visita guiada pola noite dos tempos. Folc anestésico, preguiceiro e vaporoso. Engadir que en Pontevedra é o único lugar do mundo onde se presta a tratar de reproducir coa guitarra os sons de fenómenos naturais que soliciten os cociñeiros de hamburguesas retirados que haxa entre o público.

http://www.playgroundmag.net/musica/articulos-de-musica/reportajes-musicales/escucha-integro-el-segundo-y-experimental-album-de-negro-formacion-del-espiritu-nacional

Isto é un “must” deses. Avisados quedades.
Por só 4 euros de donativo para os artistas.
O martes día 2 de abril ás 20.00 h. (Avisamos: puntualidade inglesa).

Cartaz da xira realizado por Clara Iris

Festa de presentación de “Onkalo” con Cro!


Sábado 23 de marzo ás 19.30
Os amigos de Cró veñen a saldar unha débeda pendente que tiñamos con eles, a presentación do seu novo LP “Onkalo” no Liceo Mutante. Coma todo o mundo debería saber, son uns musicazos tremendos adestrados nas artes dun rock máxico e desafiante que pasa polo progresivo ao post-rock, a música de cinema ou o post-hardcore sen esforzo aparente, non sexas manatí en terra e ven pasar a tarde ó Liceo con eles que ademáis temos preparadas varias sorpresiñas para amenizar a velada, ademáis da habitual comida a prezos de risa e demáis por só 4 euros de donativo que irá integramente para a banda.

http://spacecro.bandcamp.com/

Sede puntuais porque nós o seremos e non vos convén quedar sen ver este acontecemento!

Cando caia o sol haberá pinchada en vinilo!!!

Cineclube do Liceo Mutante: A nosa música


Mércores 20 de marzo ás 21.00

“O principio do cinema: ir cara á luz e facer brillar esa luz na nosa noite. A nosa música”
JLG en A nosa Música

Esta semana proxectaremos o filme de Jean Luc Godard, A nosa música (Notre Musique, Jean Luc Godard, Francia/Suiza, 2004, 80′,VOSE)

” Godard evita, finalmente, o artificio, porque dende un nivel ético posiciónase contra a loucura humana. Contra a barbarie, contra a guerra. A nosa música constrúese sobre a base de tres actos de referencia dantesca. No primeiro, o Inferno, recolle, aglutina e dá forma ao terror da guerra. Utilizando imaxes do cine clásico (de Griffith a Eisenstein, de Ford a Cy Enfield), de televisión e de documentais, intactas ou retocadas dixitalmente, JLg obríganos a acordarnos dos xenocidios que tiveron lugar en diferentes eras, da potencia das novas armas, da loucura das guerra, en definitiva. O segundo acto, o groso da película, é, non obstante, máis terrible. Tanto pola proximidade temporal e xeográfica que nos vincula á guerra balcánica coma pola sensación de baleiro, de perda, que se desprende das imaxes: a ponte e o mercado citados, os outeiros dende os que os serbios disparaban contra a poboación, a biblioteca en ruínas onde un testamenteiro voluntarioso trata de ordenar novamente a vella cultura. Godard recolle en imaxes (posto que en moitos casos os diálogos que as acompañan viaxan noutra dirección) as cicatrices, perdurables, que pode deixar unha guerra. [...] En última instancia, ironicamente, Godard deixaranos enxergar o paraíso. Unha estreita franxa de praia boscosa, máis alá da nosa mirada, onde Adán lle ofrece a mazá a Eva custodiada polo exército.”
Antoni Peris Grao

Entrada de balde

Cineclube do Liceo Mutante: Conspiradores do Placer


Mércores 13 de marzo ás 21.00
Jan Švankmajer é un director, poeta, escultor, artista gráfico e unha das figuras máis importantes do surrealismo checo.
Esta semana proxectaremos o seu filme Conspiradores do placer (Spiklenci slasti, Jan Švankmajer, Rep. Chec., Suíza, Reino Unido, 1966, 85′, sen diálogos)
Crítica delirante da incomunicación e da soidade na que vivimos, deixando falar aos xestos, aos obxectos, ás accións estrañas dos seus estraños personaxes, nun entramado surrealista no que mestura o humor, o absurdo e o terror.
Seis historias que se entrecruzan con seis personaxes que tratan de fuxir da soidade e o aburrimento por medio de extravagantes fetichismos. Influenciado por Sade, Sacher Masoch, Max Ernst, Borowczyk, Hans Bellme ou Duchamp. Tras a extravagancia e a parafilia escóndese un berro a favor da liberdade, do pracer e da vida.

Unha pequena mostra:https://vimeo.com/49057324

Entrada de balde

Cineclube do Liceo Mutante: A terceira xeración


Mércores 6 ás 21:00
Esta semana proxectaremos a comedia negra do director alemán R. W. Fassbinder: A terceira xeración ( Die Dritte Generation,Rainer Werner Fassbinder,RFA, 1979, 105′ VOSE)

“Unha comedia en 6 partes sobre xogos de sociedade, chea de intriga, provocación e lóxica, crueldade e loucura, parecida aos contos que se contan aos nenos para axudalos a soportar a súa vida de enterrados vivos” (R.W. Fassbinder)

Entrada de balde