Domingo 3 de xuño ás 20.30: The Conformist e Decurs
Este primeiro domingo de xuño imos ter o pracer de vivir unha noite que quedará gravada nas nosas cabezas, xa que veñen visitarnos os Conformists (USA) e Decurs (BCN)!
The Conformists son catro, son catro de St. Louis (Misuri), alí xúntanse para tocar, e iso levan facendo xa máis de 20 anos. Expertos neste tema de facer as cousas ti mesma, a música que crean parece basearse nunha premisa clara: romper con tódolos esquemas que tes na cabeza. Traballan con estruturas de cancións imposíbeis, roturas de tempo, polirritmos, perfectamente conxugados entre batería-baixo-guitarra, e de entre todo este microcosmos instrumental, aparece unha voz desgarradora con trazas do spoken word. Pódense encontrar similitudes con artistas como Shellac, Enablers, Slint ou Ian MacKaye, pero nada disto vale, xa que os Conformists teñen a súa propia linguaxe. Neste tempo que levan tocando sacaron unha chea de discos, gravados por xente como Steve Albini ou Bob Weston, calidade impecable, e o fan ben, tremendamente ben, é máis, son incríbeis! Escoita!
http://sounds.theconformists.com/
http://www.theconformists.com/main.html
Decurs son un trío de Barcelona, que levan xuntos dende 2005. A súa música tomou forma ao longo de todos estes anos, converténdose nunha mutación do punk, cheo de polirritmos, e de estruturas deformes, con letras que falan sobre o político, o persoal e o absurdo. Estes tres rapaces son xa coñecidos por ser cabezas pensantes e mans facentes do noso querido colectivo Ojalá Estë Mi Bici, e cando pasaron pola nosa casa fai un tempo quedamos ben flipados! Editaron xa unha boa chea de música, entre a que se atopa o seu último álbum “Incendio”, escoita a súa música que son un pasote!
https://decurs.bandcamp.com/album/incendio-2017-lp12
Ven desfrutar da música, da vida, ven conversar a este recuncho da ría no que creamos comunidade entre todas, chamado Liceo Mutante, aportando coma sempre, un donativo de entre 5 e 8 euros á túa elección, para que estas bandazas poidan seguir embelecendo o mundo.