Cineclube do Liceo Mutante: A Pirámide Humana

Martes 27 ás 21:30

Remata marzo e con el o ciclo adicado a Jean Rouch, coa proxección do seu filme A Pirámide Humana (La Pyramide humaine,Jean Rouch, 1959,Costa de Marfil, 88′, VOS)

A chegada dunha nova alumna, Nadine, é o punto de partida dunha análise das relacións interraciais nun Liceo de Abidxán, en Costa de Marfil. Reunidos por Jean Rouch, os alumnos interpretan o seu propio personaxe nunha “ficción” que se desenvolve a partir das relacións entre brancos e negros, escenificando os lazos de amizade e as relacións sentimentais do grupo.

Entrada de balde

Brand New Sinclairs no Liceo Mutante

Sábado 24 de marzo, 4€ ou 9€ con CD, 21:30

Tras tres anos como The Sinclairs o combo barakaldés decide dar un paso involutivo para transformarse en Brand New Sinclairs, un paso cara a aqueles sesentas vibrantes e brillantes. En decembro de 2007 lánzanse aos escenarios tanto de importantes eventos coma de escuros garitos, onde conseguen tolear á audiencia bombardeándoa con sets dotados de alma negra e descaro ye-ye, imposible conter a cadeira… xa neste 2009 preséntannos o seu primeiro disco, Ten Blue Pills, dez novas e vibrantes cancións que respiran soul, garage, funk e rhythm & blues polos catro costados. Gravado a finais do 2008 nos estudos Montreal de Pamplona da man de Hans Krüger, Ten Blue Pills plasma o son directo da banda. Un ritmo contundente e guitarras crocantes, en contraposición coa doce voz do seu cantante, conseguen este cocktail de pílulas azuis.
E agora en 2011, da man de Flor e Nata records, o selo independente con máis soleira do estado, presentan o seu segundo longa duracion de título “Healing Souls” Repetindo a fórmula sonora do seu primeiro disco (unha vez máis nos mandos Hans Krüger), pero dun xeito mais inmediata e decidido, pop, R&B, soul, garage……en un longa duracion de coidada presentacion tanto en cd coma en lp.
http://www.facebook.com/pages/Brand-New-Sinclairs/107049095985584
http://www.myspace.com/brandnewsinclairs

Suelen Estar Quartet no Liceo

Venres 23 de marzo, 21:30, 4€

Suelen Estar Quartet é un cuarteto de improvisación libre de corda frotada de Galicia, nacido fai algo máis dun ano no seo da O.M.E.Ga (Orquestra de Música Espontánea de Galicia) da que son integrantes os catro.
Non é un cuarteto clásico ao uso xa que está formado por violín, viola, violoncello e contrabaixo.

Sen partituras todo o que se crea é propio, inmediato, único e exclusivo. Déixase de ser un mero intérprete e pásase a ser compositor, un creador instantáneo. Dáselle renda solta á imaxinación, unha paisaxe, unha idea, unha emoción, un son… serven de nutrientes para desenvolver a creatividade nun momento concreto espazo/tempo.
Transmitir ou xerar de forma espontánea unha idea ou sentimento a través da música fai que cada concerto sexa irrepetible.

Experimentar de todas as formas posibles, indagar na escoita, as sonoridades dos instrumentos, a súa natureza, explorar a cada instante todas as variables posibles das que se dispoñen. Ser sensibles ao azar ou á sorpresa, moi importante como xeradora de novos camiños musicais, son parte dos métodos de investigación que se utilizan, sendo totalmente orixinal e idiosincrásico do propio cuarteto.
Trátase da creación dunha linguaxe, un código común e único, unhas novas normas do xogo, para xogar ao xogo de sempre pero de forma diferente.

http://suelenestarquartet.jimdo.com/

Kyoto + Clover no Liceo Mutante

Xoves 22 ás 21:00, 4 €

KYOTO visitan Galicia por primeira vez. Son unha banda que se move en estilos varios como o post-rock, shoegaze, experimentación…
Este trío de baixo, teclados, batería e suxestiva voz feminina, comeza en Zaragoza a finais de 2006. Tras a gravación de dous EPs e un LP “Lo que vuelve para vengarse” con Hans Krüger” en estudios Montreal, veñen a presentar o 7″ Split compartido con Fractal Sound. Lanzamento discográfico autoeditado entre as dúas bandas.

CLOVER defínense como “un proxecto musical afincado en Vigo, cuxas fronteiras están menos que pouco definidas… ” aínda que podemos dicir que son enerxía pura, baseándose no ruído controlado (por momentos) das guitarras.

http://allclovers.bandcamp.com/

Cineclube do Liceo Mutante: Pouco a pouco

Martes 20 ás 21:30
Por motivos loxísticos temos que mudar a proxección para o martes, no que, dentro do ciclo adicado a Jean Rouch, poderemos ver Pouco a pouco ( Petit à petit,Jean Rouch, 1968 – 1970, Níger- Francia, 92′ VOS)

En Ayorou, Níxer, Damouré dirixe, xunto con Lam e Illo, unha sociedade de importación e exportación chamada “Pouco a pouco”. Ao decatarse de que en Niamey, a capital, están a planear a construción dun rañaceos, o primeiro do país, deciden emprender eles mesmos a construción dun, aínda máis alto. Para iso, Damouré viaxa a París para ver como se vive nunha casa de pisos. Na cidade descobre as curiosas formas de vida e pensar da tribo dos parisienses, que describe nunhas cartas que envía con regularidade aos seus compañeiros. Estes, crendo que Damouré toleou, mandan a Lam na súa busca. En París, Damouré e Lam compran un Bugatti e coñecen a Safi, Ariane e a Philippe. O grupo decide volver a África para construír o novo edificio, pero as dúas mulleres e Philippe non conseguen afacerse á nova vida e marchan. Aos tres amigos só lles queda retirarse a unha cabana nas beiras do río para forma unha “sociedade de estúpido”, libre das ataduras da sociedade moderna.

Entrada de balde

Sorpresa de última hora!!!!

Finalmente, Atomizador (algo mellor do seu problema de gorxa) vai poder facer unha breve aparición!! Iso sí, terá que deixar de lado os seus temas máis gorgoriteiros por razóns obvias.

Lembrade: Hoxe, sábado 17 de marzo, ás 21.30 no Liceo Mutante:

Extinción de los Insectos + Atomizador + Urro

Por 3 euriños. Veña!!

Extinción de los Insectos + Atomizador + Urro

A noite do vindeiro 17 de marzo no Liceo promete ser mítica. Se falamos de Extinción de los Insectos ninguén saberá de que vai o conto, pero se engadimos que é un dúo composto polo guitarra/cantante de A Room With a View e o batería de Mushitcians, dos ollos dos máis veteranos da escea submundana pontevedresa comezarán a brotar chispiñas de melancolía. Cando A Room With a View tocaran a finais dos 90 naquela rateira que era a Mecánica os cerebros dos alí presentes estouparon abraiados; na provinciana e conservadora Pontevedra nunca tal se vira. Aquel concerto cambiou o noso xeito de ver a música, deixándonos parvos coa súa maneira de destrozar os límites interestilísticos cos que tanto nos gustaba encher a boca ata entón. Do integrismo punk e hardcore pasouse a unha apertura de oídos curiosa e sensiblemente máis desprexuizada, a unha actitude máis arriscada e, en esencia, máis punk. Non me cansarei xamáis de reivindicar a importancia dese concerto para o discorrer posterior da escea desta nosa cidade. Atrévome a dicir que, de non ter existido A Room With a View, non tería existido o Liceo Mutante. O que non estea de acordo que mo veña discutir.

Un par de anos máis tarde, se non me trabuco, chegaron Mushitcians ó mesmo escenario. A súa pegada non foi tan fonda coma a de ARWAV, pero a súa velocidade e os seus chíos fixeron tolear ás ratas que estabamos metidas naquel burato, noutro concerto inesquecible.

Pero abonda xa de chorar. Estamos no 2012 e aí os veñen, a estoupar con todo. Extinción de los Insectos é, en parte, unha incógnita para todos nós. Nunca os escoitamos, pero non é necesario. Logo dos seus primeiros grupos xa mencionados, Jose e Miguel coincidiron en proxectos tan brillantes e fugaces como Ensaladilla Rusa e Campamento Ñec Ñec, editando tres discos (“Coleópteros” e “África” cos primeiros e “Alimaña” cos segundos) que ían anos luz por diante do tempo no que lles tocou vivir. Con esas credenciais só nos podemos sentir afortunados pola súa visita.

Jose, pola súa banda, xa nos visitara nos dous últimos anos baixo o nome de Atomizador. Alguén dou en chamar ó seu estilo “ukelelecore”, pero a cousa vai máis alá. Para que escribir máis sobre o tema se vos podo amosar este vídeo?:

E ademáis, Urro. Un trío da casa, improvisadores descerebrados e radicais, sen rumbo nin frenos. Unha bendición para Pontevedra.

Vémonos no Liceo. Lembrade unha vez máis: “El que avisa, traiciona”.

Cineclube do Liceo Mutante: Jaguar

Esta semana mudamos o día de proxección para o venres.
Proseguindo co ciclo adicado ao cineasta francés Jean Rouch, proxectaremos o seu filme Jaguar(Jaguar, Jean Rouch, 1954-1967, Níger, Ghana, 88′, VOS)

Tres mozos de Níxer abandonan a súa terra natal en busca de prospe…ridade e aventuras en Costa de Marfil (Ghana). Este filme é o relato da súa viaxe, os seus encontros no camiño, as súas experiencias en Accra e Kumasi e, tras tres meses de periplo, o seu retorno á casa, coas súas familias e amigos.

 

Entrada de balde

ARIES + Muíños & Taboada, venres 9/3/12

Aries é Isabel Fernández Reviriego, Isa, ex Charades. Incapaz de aceptar que a cousa se rematara aí, que co fin de Charades (anunciado agora hai un ano) debía despedirse do seu revoltoso pop de raíces sesenteras, Isa decidiu poñer en marcha un novo proxecto para o que conta case exclusivamente coa súa irmá Virxinia, que se atreve coa batería. Xa non está en Madrid, agora está en Vigo (atentos, porque mesmo lle escribiu unha canción de despedida á cidade), pero segue escoitando sen descanso aos Beach Boys, Os Mutantes e The Zombies (as súas bandas de cabeceira), aínda que agora, como veremos, tamén se deixa influenciar por Caetano Veloso. O resultado é un delicioso compendio pop de aire psicodélico (breve pero intenso, gañando en percusión e harmonías vocais) chamado “La Magia Bruta”. Producido por Santi García (que ademais se encarga do baixo) e a propia Isabel, o disco foi gravado entre os Estudos Ultramarinos Costa Brava e os Estudos Pastora de Vigo. Soa máis íntimo, aínda que igualmente xoguetón (con esas ras de madeira que foron souvenires e agora fan as veces de castañolas en “Los Dos”).
E é unha sorte que veña ao Liceo a presentalo no que promete ser unha noite máxica.
http://aries.bandcamp.com/
http://www.playgroundmag.net/musica/articulos-de-musica/reportajes-musicales/la-magia-bruta-bcore-2012

A noite comezará con Santiago Muíños e Roberto Taboada coas súas guitarras e ukeleles, delitándonos coas súas silbantes e contaxiosas melodías.
Seica andan preparando novo repertorio para esta noite.

O marabilloso cartel é de Natalia Umpiérrez